На големото финале од 63 по ред издание на Евровизија, кое се одржа во Лисабон во Португалија, победата ја однесе претставничката на Израел Нета, со песната „Toy“.
За најдобра песна во Европа се натпреваруваа 26 финалисти, а победникот беше прогласен врз основа на гласови на жирито и 43 земји учеснички.
Домаќини на вечерта, токму како и во двете полуфиналиња, беа четири дами: Катарина Фуртадо, Даниела Руа, Филомена Каутела и Силвија Алберто.
Ова е прв пат во историјата на Евровизијата целото натпреварување да биде водено само од страна на женска водителска екипа.
Песната на претставничката на Израел се поклопува со движењето „MeToo“, кое се однесува на еманципација на жените и зголемување на нивните права, а пред полуфиналната вечер важеше за втор фаворит за победник.
На крај, сепак успеа да заврши пред претставничката на Кипар, која важеше за прв фаворит, и да стане победник на 63 издание на Евровизија.
