Главните министри во владата на израелскиот премиер Бенјамин Нетанјаху денеска ја отфрлија идејата за основање палестинска држава откога The Washington Post објави дека САД промовираат такви планови.
„Ние во никој случај нема да се согласиме со тој план, кој вели дека Палестинците заслужуваат награда за страшниот масакр што го извршија врз нас: палестинска држава со главен град Ерусалим“, изјави министерот за финансии, Безалел Смотрич.
„Палестинската држава е егзистенцијална закана за државата Израел како што беше докажано на 7 октомври“, рече тој додавајќи дека ќе побара од безбедносниот кабинет, кој треба да се состане подоцна во текот на денот, да заземе јасен став против палестинската државност.
The Washington Post денеска објави дека САД соработуваат со некои арапски држави, вклучувајќи ги Египет, Јордан, Обединетите Арапски Емирати, Катар и Саудиска Арабија, со кои Израел долго време се обидува да воспостави дипломатски односи на повоен план за регионот, што би вклучувало цврста временска рамка за формирање палестинска држава.
Палестинското Министерство за надворешни работи соопшти дека секоја политичка иницијатива што не почнува со палестинска држава како полноправна членка на ОН е „осудена да пропадне“.
Слични изјави, како таа на Смотрич, дадоа и министерот за национална безбедност, Итамар Бен-Гвир, министерот за дијаспора, Амичаи Чикли, министерот за образование, Јоав Киш, и пратеникот Матан Кахана, член на Партијата за национално единство, предводена од главниот противник на Нетанјаху, Бени Ганц.
„Катастрофа е Палестинците по 7 октомври да се наградат со формирање држава“, изјави Чикли од Ликуд за военото радио.
Војната во Појасот Газа избувна кога Хамас го нападна Израел на 7 октомври, при што загинаа 1.200 луѓе, а 253 беа киднапирани.
Во израелската офанзива на Појасот Газа оттогаш загинаа повеќе од 28.600 Палестинци, според палестинските здравствени власти.
