Премиер лигашите Ливерпул и Манчестер Јунајтед и калчолигашот Јувентус се во трка за 17-годишниот Исланѓанец за кого се зборува дека е наредната фудбалска ѕвезда.
Исак Бергман Јоханнесон е исландски фудбалер од офанзивата кој настапува во шведската лига за тимот на Норшепињ. Има само 17 години и веќе за него во битка се големи клубови како Ливерпул, Манчестер Јунајтед и Јувентус. Медиумите од Островот и од Чизмата потврдија за интересот на трите клубови.
Јоханнесон е роден во Англија кога неговиот татко Џои Гудјонсон настапуваше за Астон Вила, потоа играше и за Вулверхемптон и Лестер. Сепак, кариерата ја почна на Исланд во тимот на Акранес од каде во 2019 премина во Шведска. Игра со левата нога, висок е 180 сантиметри, а природна позиција му е десно офанзивно крило.
Сезонава во Алсвенскан лигата има одиграно 23 натпревари на кои постигна 3 голови и 8 пати асистираше. Според Transfermarkt, неговата моментална вредност е само милион евра, но сигурно Норшепињ нема да се откаже од својот бисер без добра оштета.
Има играно за сите младински репрезентации на Исланд, а моментално настапува за онаа за играчи до 21 година. За сениорската репрезеатција нема дебитирано, но веројатно и тоа брзо ќе се случи.