Во седиштето на италијанскиот шампион Јувентус има невообичаени проблеми. Велат дека „од вишок глава не боли“, но „Старата дама“ има вишок фудбалери, и тоа играчи кои во повеќето клубови би играле во првиот тим, или барем би биле во ротација.
Маурицио Сари се пожали во медиумите дека клубот мора „да се реши“ од шестмина играчи за регистрацијата за Лигата на шампиони.
„Понекогаш навистина се фрапирам кога читам вести. Пишувате за моите одлуки и за одлуките на Паратичи. Мора да се решиме од шест играчи за да ја задоволиме листата на ЛШ. Тие избори може да изгледаат по малку ненормално. Тоа ме става во многу тешка позиција 20 дена пред крајот на преодниот рок. Срамота е, бидејќи ризикуваме некои играчи да не настапат на многу високо ниво“, се жали Сари кој неодамна седна на клупата на Јувентус.
Италијанските медиуми веднаш почнаа да го „чешлаат“ составот на Јуве во потрага по тие шестмина кои нема да добијат карта за ЛШ.
Според нив, Сари нема да смета на Марио Манџукиќ, Марко Пјаца, Матија Перин, Лука Пелегрини, Даниеле Ругани и најверојатно на Сами Кедира.
Можно е неколкумина од фудбалерите на овој список да го напуштат клубот. Пелегрини можеби ќе замине на позајмица во Калјари, Ругани е во преговори со Рома, но на Перин му пропадна трансферот во Бенфика.
Кедира наводно останува, па Сари би можело да се ослободи од Родриго Бентакур или од Емре Џан за да му отвори место во редот за врска.
Засега не се знае што ги чека Пјаца и Манџукиќ, можно е да останат во Јувентус, но тешко дека ќе настапуваат во ЛШ.
