Фудбалската конфедерација на Јужна Америка (КОНМЕБОЛ) излезе со соопштение против идејата Мундијалите да се одржуваат на секои две години.
„Нема причина, предност или оправдување за промените предложени од ФИФА“, се вели во соопштението на официјалната веб-страница на КОНМЕБОЛ.
Во таа насока, десетте земји-членки на КОНМЕБОЛ потврдуваат дека нема да учествуваат на Мундијалите кое би се организирале на секои две години.
„Алчноста на ФИФА може да го подели фудбалскиот свет. Предметниот проект ѝ го сврте грбот на речиси 100-годишната традиција на светскиот фудбал, игнорирајќи ја историјата на еден од најважните спортски настани на планетата. КОНМЕБОЛ го поддржува тековното Светско првенство, со своите системи за тајминг и квалификации, бидејќи се покажа како успешен модел заснован на атлетска извонредност, талент и планирана работа“, е ставот на КОНМЕБОЛ.
Организацијата е составена од федерациите на Аргентина, Бразил, Боливија, Венецуела, Еквадор, Колумбија, Парагвај, Перу, Уругвај и Чиле.
Претходно, ФИФА ги извести репрезентациите за плановите за одржување на Светско првенство на секои две години, почнувајќи од 2026 година. На овој план се противи и УЕФА, а го поддржуваат конфедерациите на Азија, Африка, Океанија и Северна Америка, односно зоните кои имаат помалку учеснички на Мундијалите.
Од 1930 година Мундијалите се одржуваат на секои четири години, со исклучок на 1942 и 1946 година кога не се одржаа поради Втората светска војна. Претстојните собири ќе се одржат во Катар (зимата 2022), како и во Канада, Мексико и САД (летото 2026).