Имате стар рутер кој собира прашина во фиока? Вклучете го - ќе ви покажеме во шест лесни чекори како да ги приспособите неговите поставки за да го подобрите сигналот за Wi-Fi.
Техничка поддршка на порталот Which? има редовни повици од членови кои се мачат со несигурниот Wi-Fi сигнал дома. Но, дали знаевте дека вашиот стар рутер може да ви помогне? Со приклучување на стар рутер и негово нагодување, можете да го пренамените како екстендер на Wi-Fi сигналот. Тоа е остварлива алтернатива за заштеда на пари за купување сосема нов рутер.
„Многу рутери доаѓаат со вграден режим „безжичен репетитор“ или „безжично премостување“ што ви овозможува да го конфигурирате рутерот. Овде ќе разгледаме како да ги прилагодите вашите поставки за да го направите ова. Ќе функционира кај сите рутери што излегле во изминативе пет до десет години. Не само што рутерот ќе го прошири вашиот Wi-Fi сигнал, туку и Ethernet LAN-портите на уредот може да се користат и за физичко поврзување на други уреди на вашата мрежа“, велат експертите.
За да започнете, ресетирајте го стариот рутер на фабрички поставки. Точниот метод ќе се разликува, но обично тоа се прави со притискање на копчето за ресетирање на задниот дел од рутерот 30 секунди. Забележете ги IP-адресите на вашиот сегашен рутер и на стариот - тие може да се најдат на задната страна или на мала картичка од вашиот интернет провајдер. Откако ќе го ресетирате стариот рутер, следете ги овие чекори:
1. Поврзете етернет кабел на една од LAN (ethernet) портите на стариот рутер и приклучете го другиот крај во компјутерот.
2. Отворете веб-прелистувач (како Chrome или Safari) на вашиот компјутер и внесете ја IP адресата на стариот рутер во полето за адреса. Ќе ви биде побарано да ги внесете корисничкото име и лозинката на вашиот рутер.
3. Откако ќе се најавите, одете во поставките за LAN и побарајте ги поставките за DHCP. Оневозможете го серверот DHCP на стариот рутер - тоа значи дека вашиот главен рутер ќе управува со распределбата на IP адресата.
4. Ако останете во поставките за LAN, ќе ги видите поставките за IP адресата. Овде можете да поставите статичка IP адреса во истиот опсег како и вашиот тековен рутер што се користи. На пример, ако IP адресата на главниот рутер е 192.168.1.1, можете да доделите 192.168.1.2 на вашиот стар рутер.
5. Одете до поставките за безжична мрежа на стариот рутер. Треба да најдете опција за SSID или име на безжична мрежа. Ажурирајте го ова, заедно со лозинката SSID, за да одговара на вашиот моментален рутер. Ова ќе им овозможи на вашите уреди автоматски да се поврзат и беспрекорно да се префрлаат помеѓу двата рутери.
6. Зачувајте ги промените што сте ги направиле, а потоа исклучете го етернет кабелот од компјутерот. Поврзете го едниот крај со LAN-портата на стариот рутер, а другиот крај со LAN-портата на главниот рутер.
Откако ќе ги завршите техничките чекори, време е да го поставите вашиот рутер таму каде што имате слаб сигнал. Користете етернет кабел за да го поврзете стариот рутер со главниот, бидејќи обезбедува оптимални перформанси и обезбедува сигурна и ефикасна врска помеѓу двата уреди. Ако етернет кабелот е непрактичен, користењето адаптер за напојување може да биде одржлива алтернатива.
