Џил Бајден се залага за вакцини против коронавирус и учествува на политички собири, но само кога распоредот на предавања на колеџот тоа ѝ го дозволува.
На, за неа својствен, ненаметлив начин Џил Бајден ја менува традиционалната улога на првата дама на САД.
На неодамнешниот погреб на поранешниот гувернер, претседателот Џо Бајден мораше да се извини за отсуството на неговата сопруга.
„Џил не е овде со мене денес бидејќи е на предавање, таа работи со полно работно време на колеџот Северна Вирџинија“, рече претседателот.
Најавата од почетокот на студентската година дека Џил Бајден продолжува да предава на факултет се најде на насловните страници на американските весници. Никогаш порано една прва дама на САД немала кариера надвор од Белата куќа.
Седумдесетгодишната Џил се омажила за Џо Бајден во 1977 година. Тогаш тој бил вдовец со два мали сина. Двојката подоцна добила ќерка.
Како член на Националниот сојуз на наставници и доктори на науки, таа продолжи да предава дури и кога нејзиниот сопруг беше потпретседател на Барак Обама.
Како и повеќето професори во САД, таа предаваше преку настава на далечина за време на локдаун мерките, а часовите во живо почнаа повторно есенва. Џил Бајден моментално предава англиски два дена во неделата. Кога не е на факултет, можно е да ја видиме со претседателот на приватни и јавни настани, но сѐ почесто и сама на говорницата.
Вакцинација
Првата дама патува низ земјата и ги повика Американците да се вакцинираат против коронавирусот и бидејќи се одобрени вакцини за тинејџери и деца, таа исто така апелира да се вакцинираат и тие.
Таа исто така водеше кампања за демократскиот кандидат на локалните избори, присуствуваше на Олимпијадата во Токио и беше видена во кафуле со Брижит Макрон, сопругата на францускиот претседател, за време на дипломатската криза меѓу Париз и Вашингтон.
„Таа во последно време го забрзува темпото на нејзините јавни настапи“, вели Тами Виџил, вонреден професор по медиумски науки на Универзитетот во Бостон.
Се очекува првите дами во модерното време да бидат повеќе вклучени во јавните активности. Џеки Кенеди се обиде да го зачува американското културно наследство и ја преуреди Белата куќа. Ненси Реган водеше кампањи против дрогата, а Мишел Обама промовираше здрава исхрана и вежбање.
Спротивно на тоа, „Меланија Трамп се најде во неволја бидејќи не учествуваше доволно во јавните активности“, рече Виџил.
За разлика од Мишел Обама, која мораше да се справи со расистички и сексистички напади, Џил Бајден досега беше главно поштедена од вербална агресија, дури и за време на денешните тензии во политичкиот свет.
Модни промашувања
Сепак, таа беше мета на медиумите. Откако беше видена облечена во црно кожено здолниште и дезенирани хулахопки, CNN објави колумна во која ја повика да биде повоздржана кога се во прашање модните комбинации.
„Дел од нејзината работа како прва дама е да изгледа достоинствено. И елегантно“, напиша психологот Пеги Дрекслер.
И покрај тоа што ги поместува границите на нејзината улога, во исто време се грижи првата дама на САД да нема службени овластувања или должности и отворено да не се меша во политиката.
Иако на животот на американскиот претседател и улогата на првата дама сѐ уште се гледа конзервативно, Виџил истакна дека дел од администрацијата на Бајден ги поместува границите во друга насока. Негов потпретседател е Камала Харис, првата жена на функцијата, а нејзиниот сопруг е првиот „втор господин“ на САД. А тука е и министерот за транспорт Пит Бутиџиџ, кој секогаш со задоволство зборува за близнаците што ги има со сопругот.
