Познатата зеленоока Авганистанка од насловната страница на National Geographic пристигна во Италија по евакуација од Авганистан, откако талибанците ја презедоа власта во таа земја, соопшти италијанската Влада.
Канцеларијата на премиерот Марио Драги соопшти дека Италија ја организира евакуацијата на Шарбат Гула откако таа побара помош да ја напушти земјата, пренесе Guardian.
Италијанската влада ќе помогне таа да се интегрира во животот во Италија, стои во соопштението на Владата.
Гула се стекна со меѓународна слава во 1984 година како девојче бегалец од Авганистан, откако фотографот Стив Мекари направи нејзина фотографија, објавена на насловната на National Geographic.
Мекари повторно ја пронајде Гула во 2002 година. Во 2014 година таа беше во Пакистан, но се сокри откако властите ја обвинија дека купила лажна пакистанска лична карта по што беше наложена нејзина депортација.
Со авион беше одвезена во Кабул каде претседателот подготви прием за неа во претседателската палата. Таа доби и нов стан за живеење.
Италија е една од неколкуте западни земји кои по воздушен пат изнесоа стотици Авганистанци од земјата, по заминувањето на американските сили и пристигнувањето на талибанците на власт во август годинава.