Познатиот италијански производител на луксузни автомобили Ferrari одлучи да се испроба и во луксузната модна индустрија.
Првата колекција беше претставена на модна ревија во Маранело, близу Модена, каде што и се наоѓа седиштето на фабриките на Ferrari. Креативниот директор на новата облека за возрасни и за деца – со препознатливиот знак со коњот, е Роко Јаноне – дизајнер кој соработувал и со Џорџо Армани.
Во колекцијата доминираат црвената и портокаловата боја, а принтовите на материјалите се инспирирани од карактеристичните линии на автомобилите на Ferrari и на написи од весници. При создавањето на колекцијата, се истакнува, посебно внимание се посветило на употребата на материјали чиешто производство значи заштита на животната средина. Етикетите гарантираат и дека не биле искористувани работници или деца за време на производството.
Модната марка Ferrari сега е дел од холдингот „Екс-сор“, сопственост на семејството Ањели.
