Објавен е првиот трејлер за третата сезона од серијата The Witcher, последната во која ќе го гледаме Хенри Кавил.
Сè поблиску сме до датумот кога третата сезона од серијата The Witcher ќе биде објавена на платформата Netflix, а сега компанијата го објави првиот трејлер на својот канал на YouTube. За жал, гледачите нема да можат целосно да уживаат во новата сезона, бидејќи таа ќе биде поделена на два дела - пет епизоди во јуни и три во јули.
Сепак, првиот поглед на новата сезона го означува и почетокот на крајот за Хенри Кавил во улогата на Гералт, бидејќи од четвртата сезона ќе биде заменет со Лијам Хемсворт. Иако Кавил е светлата точка на серијата, чиј рејтинг по многу успешната прва сезона (90%) падна на 58% во втората на сајтот Rotten Tomatoes, многумина се убедени дека главниот актер ја напушта серијата поради незадоволство од креативните одлуки и оддалечувањето од изворниот материјал.
Останува да видиме како ќе им се допадне на гледачите новата сезона, но се чини дека гледаноста нема да биде поволна.
Изјавите на продуцентот дека новата сезона „нема внимателно да ги следи книгите“ ги разбесни фановите, кои своето незадоволство го изразија на социјалните мрежи.
„Не знам зошто овие сценаристи мислат дека можат да завршат подобра работа од книгите“, напиша еден корисник на Reddit.
„Ако сакате да земете популарен книжевен серијал за да заработите пари, барем држете се до оригиналниот материјал“, вели друг корисник.
„Хенри е буквално совршен за улогата на Гералт. Би сакал HBO да ја прават серијата наместо Netflix“.
Првиот дел од третата сезона пристигнува на 29 јуни, додека вториот дел ќе можеме да го погледнеме на 27 јули. Подолу можете да го погледнете трејлерот за новата сезона на серијата The Witcher, а под него deep fake видео во кое лицето на Хенри Кавил е заменето со новиот актер за да ви даде идеја што да очекувате.
