Велшанецот Гарет Бејл, иако можеби не се очекуваше, со насмевка и аплауз се прости од навивачите на Реал Мадрид на синоќешната прослава на 14. европска титула.
Бејл пристигна во Реал во 2013 година како големо засилување од Тотенхем и постигна 106 гола од 258 настапи, додавајќи 67 асистенции. Со кралскиот клуб освои 16 трофеи, од кои пет во ЛШ и три во Ла Лига, но во овој клуб не ги пружи игрите што навивачите ги очекуваа од него.
Имаше многу проблеми со повредите, а во еден момент дури и ја загуби мотивацијата воопшто да игра клупски фудбал, поради што шпанските медиуми посебно го критикуваа. Посебно се памети неговата парола од 2019 година кога настапуваше за репрезентацијата на Велс.
„Велс. Голф. Мадрид. По тој редослед“, е слоганот со кој Гарет Бејл ги навреди челниците и навивачите на Реал во 2019 година. Сепак, изгледа сега му простија, па на убав начин се прости од клубот.
Бејл сè уште не се одлучил за продолжението на кариерата, а не е исклучено да се прости од фудбалот на само 32 години, за што претходно пишуваа шпанските медиуми.
Постои можност Бејл да ја продолжи кариерата во Тотенхем каде што претходно настапуваше како позајмен од Реал, но сè уште не се знае дали Антонио Конте навистина го сака во својот тим.