Многу кратко по заминувањето од Баерн, полскиот голгетер ќе се врати во градот каде мина речиси една деценија, но како противник. Прашањето што многумина ги интересира е - каков дочек ќе му приредат минхенските навивачи?
Роберт Левандовски 8 сезони во неверојатен успех го носеше дресот на гигантот од Баварија, минхенски Баерн. На 375 натпревари постигна дури 344 голови, стана миленик на баварската публика, со златни букви се запиша не само во клупската историја, туку и во онаа на германската Бундеслига.
Летоска Левандовски инсистираше да си замине од Баерн. Осумте години во Минхен, плус оние четири кои претходно ги мина во Дортмунд носејќи го дресот на Борусија, сметаше дека му ја исцрпиле мотивацијата и инспирацијата да игра во Германија. Иако управата на Баерн не сакаше да слушне за негово заминување, сепак на крајот попушти и му дозволи да направи трансфер. Роберт не чекаше многу и веднаш потпиша за Барселона. Во каталонската престолнина брзо се навика и продолжи со голгетерската форма. Веќе има 9 гола на 6 натпревари, а хет-трик прослави уште во 1. коло од Лигата на шампионите кога Барса ја декласираше чешка Викторија со 5:1.
И како за беља, а многумина ќе речат „местено е“, жрепката за групната фаза од Лигата на шампиони го смести Баерн во иста група во новиот клуб на Левандовски, Барселона. Вечерва се игра 2. коло од европската елита, а Баерн од 21 часот ја пречекува токму Барса, во чиј тим за овој натпревар се наоѓа, нормално, и Левандовски.
Прашањето кое сите сакаат да го знаат, а се нестрпливи до вечер, е како навивачите на Баерн ќе го пречекаат својот поранешен херој, кој си замина на незадоволство на сите. Дали ќе добие громогласен аплауз, или ќе следат свирежи уште кога ќе истрча на загревањето еден час пред почетокот на натпреварот? Зарем е можно баварската публика да го свирка својот довчерашен јунак, човекот од кога речиси да нема човек во Минхен кој за време на осумте години не купил негов дрес? Како публиката ќе се однесува доколку Левандовски постигне гол? Она за што сме сигурни, е дека полскиот голгетер нема да се радува. Осумте години минати во еден клуб оставаат голема трага, без разлика на несогласувањата кои ги имаше на крајот. Барем така би требало да биде...
