САД и Велика Британија соопштија дека ќе разгледаат воведување санкции против рускиот претседател Владимир Путин, особено ако Русија ја нападне Украина. Reuters пренесе какви би можеле да бидат.
Санкциите против поединец вклучуваат мерки како што се замрзнување на имот во странство и забрана за патувања. Воведувањето такви мерки против Путин, Москва веројатно би ги сметала за многу непријателски.
Портпаролот на Кремљ, Дмитриј Песков изјави во средата дека тоа би било „политички деструктивно“, а претходно соопшти дека тоа би одговарало за раскинување на дипломатските врски со Москва.
Во пракса, меѓутоа, тоа не би променило многу работи. Портпаролот на Кремљ изјави дека санкциите не би му наштетиле на Путин. Имотот на рускиот претседател се наоѓа во Русија и според тоа, надвор од досег. Неговата плата е во банка која е веќе под санкции.
Како и други руски функционери, Путин по закон мора да објави колку му изнесуваат приходите и имотот. Според последните официјално објавени податоци, Путин во 2020 година заработил 126.175 американски долари. Сопственик е на стан од 77 метри квадратни, три автомобили и приколка. Има гаража од 18 метри квадратни и стан од 153,7 метри квадратни.
Најгласниот критичар на Путин, Алексеј Навални, кој се наоѓа во затвор, тврди дека Путин поседува многу повеќе од тоа и дека е сопственик на луксузна палата во близина на брегот на Црно Море.
Кремљ тоа го негира. Критичарите на Путин тврдат дека богатството му го чуваат лојални деловни луѓе. Кремљ и тоа го негира, пишува Reuters.