Легендата на Серија А, Антонио Касано, вели дека Интер би требал да игра со седуммина младинци за вечерва да загуби од Милан од реванш полуфиналниот дуел од Лигата на шампионите.
„Росонерите“ разочараа во првиот дерби дуел каде освен што загубија со 2:0 со голови примени уште во само 11 минути игра, туку и беа тотално надиграни од „Нераѕурите“. Отсуството на Рафаел Леао и раното напуштање на теренот на Исмаел Беннасер поради повреда го остави Стефано Пиоли без опции по десната страна, овозможувајќи му на Интер лесно да направи исчекор кон големото финале во Истанбул.
Говорејќи за BoboTV, поранешниот италијански репрезентативец Антонио Касано изјави дека Милан речиси и да нема шанси да го елиминира Интер.
„Интер треба да игра со седуммина играчи од примавера тимот (младинскиот тим под 19 години, заб. на прев.) за да биде елиминиран. А тука е и ризикот дека дури и тогаш Милан можеби нема да ги победи. Со Леао или без него, менува малку, Милан едноставно е инфериорен во однос на Интер. Португалецот не е Кака или Роналдињо, не го гледам на такво ниво“, анализира Касано.
Поранешниот контроверзен напаѓач во својата кариера играше за двата милански клуба и тоа една сезона по друга. Сезоната 2011/2012 ја одигра за Милан кога освои и Скудето, а наредната за Интер. Инаку е дете на Бари кое потоа се прослави во Рома, а играше уште и за Реал Мадрид, Сампдорија и Парма.
„Според мене, треба да се случи катастрофа за Интер да испадне. По првиот натпревар, настапите последниве месец дена и предноста од два гола, мое мислење е дека 'Росонерите' немаат никакви шанси. Можеби по којзнае кој пат ќе дадам погрешно предвидување...“
Додека Милан се избламира викендов бележејќи мизерен пораз од 2:0 кај Специја, Интер го продолжи моментумот со 4:2 победа над Сасуоло.
