Оскаровецот Кевин Спејси му се извини на актерот Ентони Рап кој ја обвини холивудската ѕвезда дека пробал сексуално да го искористи кога Рап имал 14 години.
Спејси рече дека не се сеќавал на случката која ја раскажа Рап и дека е „згрозен“ од приказната.
Ентони Рап рече дека Кевин Спејси пробал сексуално да го искористи во 1986 година, кога Рап имал 14, а Спејси 26 години.
Инцидентот наводно се случил на забава која се одржувала во куќата на Спејси. Рап вели дека му станало досадно, па отишол во спалната соба да гледа телевизија. По забавата Рап останал таму, а Кевин Спејси влегол во собата додека бил во алкохолизирана состојба, го фатил Рап во раце и го спуштил на креветот, по што се качил над него. Рап веднаш истрчал во купатилото, за веднаш потоа да ја напушти куќата на актерот.
Спејси вели дека не се сеќава на овој инцидент, но дека сите во неговиот живот знаат дека тој имал односи со мажи и жени во неговиот живот, и дека оваа приказна му помогнала да се соочи со себе и решил животот отсега да го живее како геј маж.
Ова е првпат Спејси јавно да признае дека е геј, иако медиумите често го шпекулираа тоа.
„Навистина сум свесен за времето во кое живееме и колку е важно да се кажат ваквите искуства, па затоа се надевам дека ова ќе направи разлика“, изјави Рап во интервјуто за BuzzFeed.
Ентони Рап вели дека бил охрабрен од жените кои излегле како жртви на сексуално насилство во случајот со Харви Вајнстин, па се решил и тој да истапи со оваа приказна.