По објавата на средношколка за случувањата во средното музичко училиште „Илија Николовски Луј“, која беше пренесена во медиумите, Хелсиншкиот комитет за човекови права се огласи охрабрувајќи ги средношколците да пријават слични случаи на психичко насилство.
„Објавата го реактуелизира долгогодишниот проблем со непедагошко, непрофесионално и насилничко однесување на наставниците кон учениците. Кога училиштето станува небезбедна средина во која децата се подложени на малтретирање, омаловажувања и притисоци, тоа не значи само кршење на Конвенцијата за правата на детето, туку остава долгорочни последици врз нивното здравје и понатамошниот животен развој.
Досегашната пракса покажува дека институциите несоодветно или воопшто не постапуваат по пријави за деградирачко, дискриминирачко и несовесно однесување на наставници кон ученици“, стои во соопштението на здружението кое врши мониторинг на состојбата со човековите права, обезбедува правна помош, соработува со други организации и со државните органи во насока на зголемување на промоцијата, почитувањето и заштитата на човековите права и слободи.
Оттаму велат дека заедно со младинските организации – Националниот младински совет на Македонија, Младинскиот образовен форум и Сојузот на средношколци имаат заедничка намера да не дозволат и овој случај да се заборави откако ќе згасне медиумскиот интерес, туку кон прашањето да се пристапи системски.
„Ги охрабруваме сите ученици да пријават вакви искуства и заедно да извршиме притисок за институционално справување со овој проблем. Поради бројните проблеми со кое со соочува образовниот систем, кадарот кој ги крши основните педагошки начела и закони во својата работа несомнено придонесува за очигледната дисфункционалност на образованието, слабите резултати и трауми кај учениците. Училиштата мораат да бидат безбедна средина за нивните ученици.“
Хелсиншкиот комитет веќе постапува по пријавите кои пристигнаа веднаш по објавата за музичкото училиште. По добиени сознанија дека професорите вршат притисоци за повлекување на сведоштвата по излегувањето на приказната во јавност, оттаму ги охрабруваат учениците да ги пријават и ваквите случувања.
НМСМ, МОФ или ССРСМ ќе им помогнат на учениците да стапат во контакт со тимот за бесплатна правна помош на Хелсиншкиот комитет. Доколку сте имале слично искуство, обратете се на правниот тим во канцеларијата на улица „Наум Наумовски Борче“ 83 во Скопје или на helkom@mhc.org.mk, +389 (0)2 3119 073 и +389 (0)72 278 436.
