Иако никој не може со сигурност да каже дека ќе доживее 100 години, има многу научни студии кои покажуваат како исхраната е поврзана со долговечноста.
Конкретно, бројни студии докажаа дека антиинфламаторната храна игра важна улога во зголемувањето на шансите за долг и здрав живот.
Оваа храна содржи соединенија кои го намалуваат воспалението во телото. Иако сите антиинфламаторни намирници се корисни, постои една која диететичарите препорачуваат да ја јадеме секој ден доколку сакаме да живееме до 100 години.
Зеленчукот, овошјето, интегралните житарки, гравот, мешунките, рибата и маслиновото масло се антиинфламаторна храна. Сепак, диететичарката Сузан Бауерман го издвојува зелениот лиснат зеленчук и им препорачува на луѓето да го јадат секој ден.
„Зелениот лиснат зеленчук како спанаќот, кељот, блитвата, сенфот и зелената салата се на врвот на мојата листа. Многу луѓе не јадат доволно од овие намирници, а тие се исклучително богати со хранливи материи. Тие се извор на фитонутриенти како и бета-каротен, кој телото кога е потребно, го претвора во витамин А. Исто така, содржи минерали како калциум, магнезиум, калиум и влакна и е извор на вода“, објасни таа за The Parade.
Научните студии ја поддржуваат врската помеѓу редовното консумирање лиснат зеленчук и долговечноста. Едно истражување покажа дека луѓето кои јадат една до две порции зелен лиснат зеленчук на ден се 11 години помлади од луѓето кои не ги јаделе редовно.
Бауерман забележува дека лиснатиот зеленчук е неверојатно лесен за внесување во оброците бидејќи може да се јаде како салата, да се додаде во супи, чорби и тестенини. Може да биде дел од јадења со омлети и јајца или да се меша со овошје, млеко со малку маснотии и протеински прав во здраво смути.
Покрај секојдневното консумирање на лиснат зеленчук, диететичарката Лина Бегдаче препорачува екстра девственото маслиново масло да биде основно масло за готвење. Таа советува и мрсна риба од див улов двапати неделно.
„Цврсто верувам во медитеранската исхрана, која е полна со антиинфламаторна и антиоксидантна храна, која вклучува маслиново масло и риба. Медитеранската исхрана е поврзана со помал ризик од хронични болести, подобро ментално здравје и отпорност на стрес, што е важно за подобрување на квалитетот на животот“, истакна Бегдаче.
Како што антиинфламаторната храна може да додаде години на вашиот живот, така и воспалителните намирници може да го скратат. Затоа е многу важно да се намали внесот на ултраобработена храна.
