Со синоќешната победа во полуфиналето од Лигата на нации во Ротердам репрезентацијата на Хрватска ѝ сруши силна традиција на Холандија.
Натпреварот се играше на стадионот „Де Кујп“, а Холанѓаните не го имаа одбрано туку-така. Имено, на овој стадион „Лалињата“ немаа пораз неверојатни 8.281 ден, или поедноставно - 23 години.
Дека традицијата не игра на теренот, и дека постои за да биде срушена, се погрижија „Ватрените“ кои, иако на продолженија, сепак успеаја да триумфираат. Не само што ја го срушија митот за непобедливоста на Холандија на „Де Кујп“, туку и им ги скратија надежите за триу,мф во Лигата на нации на домашен терен. Холандија е организатор на фајнлфор турнирот.
Последен пат кога Холандија загуби на овој стадион беше на 11 септември 2000 година во квалификациите за Мундијалот 2002 во Јужна Кореја и Јапонија. Тогаш Португалија славеше со 2:0, а Холандија одигра очајни квалификации и не се пласираше на завршницата.
Дека и самите играчи биле свесни за статистиката, говори изјавата на Френки де Јонг:
„Бевме свесни за таа статистика. Штета што е готово, но мораше еднаш да се случи. За жал, тоа беше вечерва“.
