ФФМ објави дека Македонија ќе одигра пријателски натпревар против Хрватска на 3 јуни на гости.
Натпреварот ќе биде дел од подготовките на „Ватрените“ за настапот на ЕУРО 2024 во Германија, каде се во група со Шпанија, Италија и Албанија.
„Ни претставува задоволство што против Хрватска, една од најсилните европски селекции, ќе одиграме контролен натпревар. Тое е потврда за нашиот статус, силните репрезентации со голема почит гледаат на нашата селекција. Натпреварот ќе биде одлична можност да напредуваме како тим и се разбира да се обидеме да ја зголемиме конкуренцијата во тимот пред почетокот на квалификациските натпревари“, изјави селекторот Благоја Милевски, кој синоќа го продолжи договорот со ФФМ.
„Македонија ни е одличен противник во таа прва фаза од подготовките за ЕУРО. Тоа е репрезентација која есенва ремизираше дома со Италија и Англија, што покажува дека ни претстои вистински тест преку кој ќе дознаеме каде сме во тој момент и што треба уште да работиме пред да заминеме во Германија. Со оглед на подготовките во Риека, сакавме да играме на 'Рујевица' за да избегнеме дополнително патување, па овој договор исполнува сѐ што сакавме од тој прво натпревар во јуни“, изјави селекторот на Хрватска, Златко Далиќ.
Натпреварот ќе се игра на 3 јуни во Риека на стадионот „Рујевица“, кој е со капацитет од 8.191 човек. Овој стадион е дом на клубот Ријека, каде своевремено настапуваше поранешниот капитен Стефан Ристовски, кој за жал нема да биде во можност да игра со Македонија пред риечани бидејќи се повлече од репрезентацијата бојкотирајќи го селекторот.
Македонија и Хрватска досега се имаат сретнато 8 пати, а скорот е во корист на Хрватите кои имаат 5 победи, ние имаме 1, а 2 натпревара завршиле нерешено. И гол-разликата 12:9 е во корист на Хрватите. Последен пат игравме во 2012 година.
Хрватска првиот натпревар на ЕУРО 2024 го игра на 15 јуни против Шпанија.