Фудбал

Килијан Мбапе не сака да го продолжи договорот со ПСЖ

11. декември 2019 - 18:23 | А.С.

Пари Сен-Жермен сака да го продолжи договорот со младиот Килијан Мбапе што ќе истече во 2022 година, но напаѓачот не е подготвен да потпише нов во моментов, објави угледниот весник Marca.

Французинот е желба на сите големи клубови во Европа, а многумина предвидуваат дека има потенцијал да стане најдобар фудбалер на светот во иднина.

Каде ќе ја продолжи кариерата многу ќе влијае во реализирањето на овие предвидувања, односно дали ќе биде максимално искористен неговиот неоспорен талент.

Многумина би сакале да го видат Мбапе во редовите на Реал Мадрид, но ПСЖ следното лето нема да преговара со ниту еден клуб за можен трансфер на 20-годишниот Французин, без разлика дали тој не сака да потпише нов договор, вели спортскиот директор на клубот, Леонардо.

Загриженоста во Париз расте поради негодувањата на Мбапе на изминатите два натпревара, откако Томас Тухел го изваде од игра.

Одличниот напаѓач не беше среќен бидејќи беше сменет на средбите со Нант и Монпелје и целосно го игнорираше Германецот кога излегуваше од терен.

Мбапе сака да ја освои Лигата на шампиони, но и престижната награда Златна топка, па ако ПСЖ не би можел да му помогне во остварувањето на неговите амбиции, сигурно ќе порасне неговото незадоволство од клубот.

Коментирај