Севернокорејскиот лидер Ким Џонг Ун присуствуваше на изведбата на балетот „Трнорушка“ на Пјотр Илич Чајковски во Русија и беше импресиониран, објави радиото „Гласот на Кореја“.
„Ким Џонг Ун ја пофали сценската изведба, која сликовито ја демонстрираше моќта на балетот преку прекрасни и извонредни уметнички слики и ја изрази својата длабока благодарност до изведувачите и персоналот на театарот“, објави радиостаницата.
Балетот се одржа вчера во филијалата на театарот Марински во руското пацифичко пристаниште Владивосток.
Рускиот амбасадор во Северна Кореја, Александар Масегора, претходно изјави дека Ким изразил желба да присуствува на настапот бидејќи „многу ја сака уметноста“.
„Трнорушка“ имаше премиера во огранокот на театарот Марински во Владивосток во 2017 година.
Претходно вчера Ким му се придружи на рускиот министер за одбрана Сергеј Шојгу на аеродромот Кневичи во близина на Владивосток, каде што ги прегледа модерните руски воени авиони.
После тоа, севернокорејскиот лидер ја посети фрегатата на Пацифичката флота Маршал Шапошников. Ким е во Русија на покана на рускиот претседател Владимир Путин. Во средата тие разговараа на космодромот Восточни на кои учествуваа делегации од нивните земји, а се сретнаа и приватно.
