Влијателната сестра на севернокорејскиот лидер Ким Џонг Ун ги предупреди САД да не „создаваат проблеми“ додека претседателот Џо Бајден се подготвува да ја утврди политиката кон Кореја, објави денеска BBC.
Во коментар за државните медиуми, Ким Јо Џонг ги критикуваше САД и Јужна Кореја за спроведување заеднички воени вежби.
Таа ги даде коментарите ден пред закажаното пристигнување на високи американски претставници во Сеул. Владата на САД соопшти дека со недели работи на воспоставување дипломатски контакт со Северна Кореја. Пјонгјанг сѐ уште не го призна Бајден за нов претседател на САД.
Северна Кореја не одговори на обидите на администрацијата на Бајден да воспостави неформален дипломатски контакт. Спорот меѓу двете земји околу нуклеарните и балистичките програми на Северна Кореја продолжува.
Официјалниот весник Rodong Sinmun ја цитираше изјавата на Ким Јо Џонг:
„Мал совет до новата американска администрација која се обидува да го пренесе мирисот на барут преку океанот до нашата земја. Ако сакаат да спијат мирно во следните четири години, подобро им е да се воздржат од правење проблеми уште во првиот чекор“.
Таа повтори дека нејзината земја се спротивставува на заедничките воени вежби - кои Северна Кореја ги опиша како подготовки за напад - велејќи: „Јужнокорејската влада сега повторно избира ‘марш на војна’, ‘марш на криза’“.
Ким Јо Џонг е помалата сестра на Ким Џонг Ун и единствената меѓу браќата и сестрите која важи за негов близок и моќен сојузник. Таа би можела да раководи со владата на Северна Кореја во отсуство на брат ѝ или ако нешто му се случи.
Ова не е првпат Ким Јо Џонг да покаже сила – лани во септември таа се закани дека ќе ја затвори канцеларијата за врски ако Јужна Кореја не ги спречи групите на пребегани Севернокорејци да праќаат летоци на Север.