Шпекулациите за здравствената состојба на севернокорејскиот лидер Ким Џонг Ун не стивнуваат, а официјален Пјонгјанг не дава никакви конкретни објаснувања за отсуството на лидерот од важни државни настани.
Како можна наследничка на Ким се споменува неговата помлада сестра Ким Јо Џонг. Таа е родена на 26 септември 1987 година, би можела да раководи со владата на Северна Кореја во отсуство на брат ѝ или ако нешто му се случи.
Ким Јо Џонг не само што е „крвно чист наследник“, туку е и истакнат член на Партијата. Ким Јо Џонг минатиот месец за првпат имаше јавно обраќање, а е редовен и истакнат учесник на сите клучни самити на кои присуствува Ким Џон Ун. Како и за сѐ поврзано со Северна Кореја, а особено со владејачката фамилија, малку се знае за Ким Јо Џонг.
Најмногу податоци има собрано Мајкл Маден кој го води блогот North Korea Leadership Watch. Тој вели дека Јо Џонг е заменик-директор на Работничката партија на Кореја, што секако е многу моќна позиција.
Маден вели дека таа исто така работи како „советничка“ на брат ѝ Ким Џонг Ун, односно има функција на шеф на Кабинетот – организира јавни настани, ја подготвува неговата агенда и логистика. Таа исто така има врски со управата на Националната гарда и со Министерството за државна безбедност.
Кога била дете го има посетено Западот – учела во основно училиште во Берн, Швајцарија од 1996 до 2000 година под името Ким Јонг Сун и живеела во севернокорејската амбасада.
Со оглед на тоа дека е голема веројатноста таа да е наследничка на лидерот на Северна Кореја, имајќи го предвид уредувањето на земјата тоа би значело дека таа ќе биде врховен лидер.
Ваквите информации ги подгреваат теориите за првата „диктаторка на Северна Кореја“, а корисниците на социјалните мрежи веќе почнаа со интересни споредби, теории на заговор, но и предупредувања дека Ким Јо Џонг би можела да биде уште посуров владетел од брат ѝ.
