Северна Кореја не одговори на обидите на администрацијата на американскиот претседател Џо Бајден, да воспостави неформален дипломатски контакт, пренесе Reuters, повикувајќи се на извор од американската администрација.
Отворено е прашањето каков пристап ќе има администрацијата на Бајден кон Пјонгјанг во врска со прашањата на нуклеарното оружје и балистичките ракети. Секретарот за одбрана на САД, Лојд Остин патува во Јапонија и Јужна Кореја, па се очекува Северна Кореја да биде една од темите.
Анонимен претставник вели дека администрацијата на Бајден неколку пати се обидела да стапи во контакт со Пјонгјанг, почнувајќи од февруари годинава, но нема никаков одговор.
Администрацијата на Бајден досега внимателно зборуваше за односот со Северна Кореја, но најави ревизија на претходно воспоставената врска меѓу поранешниот претседател Доналд Трамп и Ким Џонг Ун.
Сепак, Трамп не успеа да го убеди Ким да се откаже од нуклеарниот арсенал.
Според претставник на актуелната американска администрација, САД со Пјонгјанг година дена нема никакви контакти и покрај многубројните обиди.
Во текот на кампањата, Бајден го опишуваше Ким како криминалец и зборуваше дека со него ќе се сретне единствено ако овој се согласи да го укине нуклеарниот арсенал. Државниот секретар на САД, Ентони Блинкен засега не зборува за нови санкции кон Северна Кореја, со огледа на тоа дека досегашните санкции не дадоа резултати.
Извештајот на ОН покажа дека Северна Кореја продолжи да ја развива нуклеарната програма во текот на 2020 година и покрај меѓународните санкции, а 300 милиони долари за тоа обезбедила преку сајбер напади.
