Синоќа се одигра 32 коло од американската МЛС лига а во него Ди Си Јунајтед на домашен терен го совлада Торонто со резултат 1:0. Победата ја донесе Вејн Руни, кој го постигна единствениот гол на натпреварот со прекрасен гол од слободен удар.
Поранешниот капитен на Манчестер Јунајтед и англиската репрезентација покажа дека годините никогаш нема да го спречат да постигнува атрактивни голови.
Во тек беше 18-тата минута од натпреварот кога судијата досуди слободен удар за Ди Си Јунајтед на околу 30 метри од противничкиот гол. Топката ја намести Вејн Руни и со фантастичен удар ја испрати топката под пречката на голманот Александер Боно.
Изреката „Формата е минлива, класата е вечна“ звучи како да е измислена токму за играчите како Вејн Руни и Златан Ибрахимовиќ, кои и далеку навлезени во четвртата деценија од животот покажуваат дека и понатаму се способни да постигнуваат голови и да носат победи за нивните тимови.
Ди Си Јунајтед по 32 одиграни кола се наоѓа на 6. место на табелата во МЛС лигата, но е во одлична серија од четири последователни победи. Тимот на Торонто се наоѓа на деветтото место, а под него се наоѓаат само уште Чикаго Фајр и Орландо Сити.
