Предводникот на Ливерпул, Јирген Клоп, се пофали дека неговите играчи речиси сите се вакцинирани, а одбивањето да се прими вакцина го спореди со возењето пијан.
Говорејќи околу вакцинацијата, 54-годишниот германски стратег рече дека не разбира како вакцината против коронавирусот во очите на антиваксерите може да се гледа како „ограничување на слободата“, а откри и дека 99% од фудбалерите на неговиот Ливерпул се вакцинирании.
„Ако кажам дека сум вакциниран, другите луѓе велат 'Како можеш да ми кажеш дека треба и јас да се вакцинирам?'. На некој начин тоа е како возење пијан. Веројатно сите сме биле во ситуацијата да сме се напиле едно или две пива, мислејќи дека можеме да возиме, но законот вели дека тоа не е дозволено, па затоа не возиме. Но, тој законот постои не за да ме заштити мене поради тоа што сум се напил две пива и сакам да возам, законот постои за да ги заштити другите, бидејќи јас сум пијаниот. И овој закон сите го прифаќаме“, вели Клоп.
Вакцинацијата на играчите од клубовите во Премиер лигата не е посакуваното ниво бидејќи само 7 од 20-те премиерлигаши можат да се пофалат дека целосно вакцинирале повеќе од 50% од своите фудбалери. Лидер е токму Ливерпул со 99% вакцинирани фудбалери.