Ливерпул ја заврши групната фаза во Лигата на шампиони со ремито против дански Мидтјиланд (1:1), а по натпреварот, менаџерот на Ливерпул, Јирген Клоп, најмногу зборуваше за ВАР.
Имено, специјалната технологија беше вклучена во натпреварот повеќепати, со многу долги паузи, што е причината зошто Клоп сѐ помалку ја поддржува нејзината примена.
„Сето тоа трае предолго. Не отидов да ја проверам точноста на одлуките, но секоја беше проверувана по пет минути, а надвор е ладно. Веќе можам да видам дека луѓето ќе се чудат што зборувам за ова, но проверките беа навистина долги и беше ладно надвор, и тоа воопшто не ни помогна. Јас бев еден од оние кои ја поддржуваа ВАР, ама после ова вечерва не сум веќе сигурен. Сега ја имаме и мора да се носиме со тоа“, изјави Клоп по натпреварот.
ВАР прво интервенираше на пеналот на Данците кога голманот Келехер направи фаул над домашниот напаѓач Дрејер. Судијата најпрво покажа офсајд, но по долго разгледување на репризата, досуди дека нема офсајд и покажа на пенал со кој израмни Мидтјиланд. Уште поголема пауза видовме кога Шолц погоди за водство на данскиот тим, но ВАР сепак покажа дека еден од домашните играчи бил во офсајд. Уште една долга пауза видовме по голот на Минамин што првично беше поништен поради офсајд. ВАР покажа дека напаѓачот на Ливерпул не бил во недозволена позиција, но дека Мане играл со рака во градењето на акцијата, иако не изгледаше дека има снимки што стопроцентно го докажуваат ова.