Вечерва во Јавна соба во 19 часот ќе се одржи првиот од низата настани во рамките на проектот „Книжевни магнитуди“ што го приредува авторката Марта Маркоска, која е и носител на проектот.
„Книжевни магнитуди“ e прв од ваквиот тип настани во Македонија каде секој слушател/читател ќе има можност да го запознае авторот одблизу и да го праша сè што сака, за него и за делото, бидејќи разговорите ќе се водат како отворена трибина, без цензура, најави Маркоска која ќе биде и модератор на настанот.
Вечерва гости ќе ѝ бидат Ристо Лазаров и Лидија Капушевска Дракулевска.
„Македонските поети заслужуваат достојно да бидат претставени пред што поголема слушателска, а потоа и читателска публика без разлика на која генерација ѝ припаѓаат. На овој начин, младите авторски генерации ќе добијат поголем публицитет пред постарите, и обратно, постарите ќе ја добијат должната почит пред помладите генерации“, вели Маркоска.
„На ‘Ти’ со авторот. Без цензури. Запознајте го човекот-автор за подобро да го разберете неговото творештво! Да ги обединиме практичарите и теоретичарите, поетите и прозаистите, книжевниците и филозофите, слушателите и читателите. Да успееме, најсетне, да направиме пакт и да се запознаеме меѓусебе подобро, особено затоа што во последниве, не години, туку, децении, значително си недостигаме!“, стои во најавата за настанот.
Тие ја покануваат публиката да „влезе во рингот“ на овој книжевен „боречки клуб“ и да ги прошират своите видици. Влезот на настанот е слободен.