Хемикалиите во боите за коса го прават влакното понежно и поподложно на оштетување, па затоа на бојадисаната, бланширана или шатирана коса ѝ треба подолга и подобра нега за да ги задржи цврстината, сјајот и убавината.
Има некои работи што треба да престанеме да ги правиме бидејќи се погрешни чекори во режимот на нега на косата, како на пример, да почекате пред првото миење на косата по боењето. На косата ѝ треба некое време да ја впие и задржи бојата, па би било пожелно да почекате барем ден-два пред повторно да ја измиете косата по миењето од бојата. Секако, користете шампон за бојадисана коса, по можност за нијансата што ја користите.
Ова се петте најчести грешки во негата на бојадисана коса:
Премногу топлина
Фенот, пеглата и виткачот за коса ги оштетуваат влакната и на нетретирана коса, а кога е бојадисана, шетата е уште поголема и повидлива. Изложеноста на преголема топлина ја избледува бојата и го суши влакното, па најдобро е да го сведите користењето на овие апарати на минимум.
Заборавате на регенераторот
Дури и ако сте немале потреба да користите регенератор кога не сте ја боеле косата, на бојадисаната коса тоа ѝ е потребно за да изгледа негувано и свежо, Регенераторот не само што помага за обновување на оштетеното влакно, туку остава и заштитен слој што ја чува бојата.
Не користите производи за нега
На бојадисаната коса ѝ е потребна дополнителна нега бидејќи го губи сјајот со секое миење. Особено ако ја бланширате и бојадисувате во некоја од русите нијанси, дополнителната заштита со пакувања, масло, силиконски капки и слични производи е задолжителна, а не само пожелна.
Грубо ја сушите
Сушењето коса со крпа во секој случај е подобро од фенирање, но сепак не ја бришете косата со груби потези бидејќи мокрото влакно е покршливо и понежно од сувото. Најдобро е 5-10 минути да ја чувате косата замоткана во памучна маица што ќе ја апсорбира влагата, а потоа досушете ја природно.