Комарците не го пренесуваат коронавирусот, уверуваат повеќе научни и здравствени центри во светот.
Според Светската здравствена организација, нема податоци или докази дека коронавирусот се пренесува преку комарец.
Лоренс Стенбери, директор на Институтот за глобално здравје при Колеџот Вагелос во Њујорк, изјави дека при истражување, нивните научници се обиделе да заразат комарци со коронавирус, но не успеале.
„Комарците имаат некои вируси кај нив. Но, апсолутно нема докази дека можат да се заразат со новиот коронавирус или, пак, дека можат да го пренесат“ нагласува Стенбери.
Д-р Амеш Адаља од Центарот за здравје „Џон Хопкинс“ во Балтимор, исто така, истакнува дека комарците не можат да го пренесат коронавирусот, односно дека не постојат докази за такво нешто.
„Но, треба да се има предвид дека тие можат да пренесат некои други заразни болести. Меѓу нив се западнонилската треска, енцефалитис, вирусот зика и денга-вирусот“, додаде Адаља.
Затоа е многу важно просторот во кој живеат луѓето да не биде подложен за размножување на комарци, а во местата каде постојат поголем број комарци да се носи облека која ќе ги заштити луѓето.