Германскиот туристички концерн Touristik Union International (TUI) оваа година и покрај КОРОНА кризата очекува дека состојбата со патувањата ќе се нормализира до лето.
Сепак, според директорот на концернот, Фридрих Јусен, TUI сепак ќе понуди само околу 80 проценти од летовите во споредба со претходните години, со цел да се достигне оптималното пополнување на авионските капацитети.
Во изјава за весникот Rheinische Post, Јусен предупреди дека поради таквата состојба, на некои летови кон Медитеранот авионите брзо ќе бидат поплнети. Тој верува дека Германците ќе потрошат повеќе пари на патувања оваа година, а причината за тоа е што ќе се искористат ваучерите за откажаните патувања од 2020 година.
Исто така, Јусен посочува дека луѓето, како што покажуваат истражувањата, копнеат да патуваат по тешката пандемиска година.
Тој очекува дека започнатата вакцинација наскоро ќе ги отстрани ограничувањата за патување. Според него, TUI има намера годинава да ги врати во функција сите 16 крузери. Јусен сепак е реален дека оптимистичка прогноза ќе има дури за 2022 година кога ќе може да се смета дека туризмот се вратил на нивото од претходните рекордни години како што беше во 2019. Тековната година, според него, ќе биде година на транзиција, бидејќи очекувано слаби ќе бидат првите шест месеци.
Тој е убеден дека бизнисот со годишни одмори ќе закрепне побрзо од другите патувања, вклучувајќи ги и службените патувања.
„Видеоконференциите и понатаму ќе заменуваат одредени разговори, но доживувањата од одмор не може да се заменат со ништо дигитално“, рече тој.
