Одбивањето да се самоизолирате по наредба на властите од денеска е нелегално во Англија, а казната што ќе ја платите во спротивно е 10.000 фунти.
Секој кој ќе добие позитивен тест на COVID-19 или му било кажано дека бил во контакт со позитивен случај, сега е законски обврзан да се самоизолира во карантин.
Ваквата одлука следи откако студија што ја нарача Владата покажа дека само 18% од луѓето кои имале симптоми оделе во самоизолација.
Во меѓувреме, Владата вети дека ќе обезбеди непрекината набавка на заштитна опрема за работниците во „првата борбена линија“ за во текот на зимата.
Четиримесечните залихи на основна заштитна опрема како маски, визири и одела, ќе бидат достапни од ноември, соопшти Министерството за здравство.
Почнувајќи од денеска, казниво со закон е секое непостапување по решение за самоизолација, со парични казни од 1.000 до 10.000 фунти за оние кои во неколку наврати нема да се самоизолираат или ќе направат потешки прекршувања.
Секој со симптоми на COVID-19 или позитивен тест мора да се изолира на 10 дена, а луѓето кои живеат во исто домаќинство со нив или кои биле контакти на регистриран позитивен случај мора да се самоизолираат 14 дена.
Студијата покажа дека најчестата причина зошто луѓето не се самоизолираат е бидејќи нема кој друг да им пазари, а втората е бидејќи почувствувале подобрување на здравствената состојба.
Мажите и младите луѓе се со повисок ризик да не ги почитуваат мерките за самоизолација, покажа студијата.
