Синоќа се комплетираше 33. коло во Калчото по кое и тоа како се искомпликува борбата за пласман на местата кои водат во Лигата на шампионите.
Милан цела сезона беше прв или втор, а сабајлево се разбуди на 5. место, надвор и од Лигата на шампионите. Тоа е како резултат на вториот последователен пораз откако синоќа доживеа дебакл од 3:0 на „Олимпико“ од Лацио.
Дека Милан нема да има добар ден најави Хоакин Кореа уште во 2. минута. Истиот играч шест минути по паузата го дуплираше водството, а голгетерот Чиро Имобиле на три минути до крајот го постави конечниот резултат.
Мора да се напомене и дека „Росонерите“ беа без Златан Ибрахимовиќ кој заздравува од мускулна повреда.
Милан претходно загуби и од Сасуоло, па со седмиот пораз сезонава падна на 5. место со 66 бодови, исто колку што имаат и Наполи и Јувентус. Лацио, пак, сега има 61 бод и е едно место подолу, но има и натпревар помалку, оној одложениот со Торино.
Пробив меѓу првите четири направи и Наполи кој синоќа славеше на гостувањето кај Торино. „Партенопеите“ бодовите ги осигураа уште во првите 13 минути игра кога Тимуе Бакајоко и Виктор Осимнех погодија во домашната мрежа.
На овој натпревар полседните 5 минути ги одигра и нашиот Елиф Елмас која веќе долго време нажалост е само замена при крајот на натпреварите.
Одличната форма во последно време на тимот на Џенаро Гатузо му донесе скок во местата кои водат во Лигата на шампионите, што и е цел на Наполи сезонава.
Со пет кола до крајот, борбата за пласман во елитата на европскиот фудбал и тоа како стана интересна. Лацио се приклучи во трката, но затоа Рома отпадна.