Како што стојат работите во моментов, Серија А би можело да се обнови на 13 или 20 јуни, откако неделава конечно беа утврдени протоколите за групни тренинзи во Италија.
Секако, натпреварите ќе се играат без физичко присуство на навивачи, но тоа не значи дека трибините ќе бидат празни.
Лацио има симпатична идеја: ќе го наполни стадионот со фотографии на своите навивачи.
„Размислувавме како може да им дадеме прилика на навивачите да бидат на стадион кога ќе почнеме пак со натпревари. Можам да откријам дека работиме на тоа и следната недела планот ќе биде целосно функционален. Секој кој сака да биде присутен на стадионот може да ни прати своја фотографија, а ние ќе ги поставиме на столчињата“, соопшти клупскиот директор за односи со јавноста Стефано Де Мартино.
„Дополнително ќе објасниме како може да учествуваат навивачите и работиме на веб-страница посветена на оваа иницијатива“, најави тој.
Идејата сепак не е оригинална. Уште минатиот месец истото го направија во Борусија Монхенгладбах, чии навивачи добија прилика да пратат нивни фотографии што потоа беа испечатени на картонски исечоци поставени на трибините. Навивачите со сезонски влезници ќе бидат „присутни“ на нивните назначени места, а останатите ќе бидат сместени на северната трибина.
Навивачите на Гладбах ваквото присуство на трибините ќе ги чини 19 евра, а сите приходи ќе бидат донирани во хуманитарни цели.
Бундеслигата се врати минатиот викенд, а Борусија играше во гости кај Ајнтрахт во Франкфурт и победи со 3:1. В сабота би требало да видиме како ќе изгледа идејата во пракса кога ќе игра на домашен терен против Баерн.