Avtovaz ги објави првите фотографии од новата лимузина на Lada која има повисоко растојание од земјата за разлика од останатите возила во оваа категорија. Vesta Sedan Cross е уникатен модел, нетипичен за источноевропските производители на автомобили.
Повишените верзии на моделите седан се права реткост на пазарот, со оглед на тоа што производителите обично им нудат на купувачите „крос“ автомобили кои се настанати на база на хечбек или караван.
Volvo е еден од оние производители кои отстапија од тие правила и пред неколку години оваа компанија ја произведе лимузината S60 Cross Country. Сега, по истите стапки тргна и Lada.
Руската компанија од Vesta Sedan направи „крос“ варијанта, базирана и на Vesta SW Cross. Lada Vesta Sedan Cross има значително поголемо растојание од земјата во однос на стандардната верзија на оваа лимузина. Таа изнесува цели 203 мм, што е дури повеќе од некои кросовер/SUV модели.
Освен тоа, автомобилот има и додатни заштитни елементи на долниот дел од каросеријата, кои го штитат возилото од помали физички оштетувања предизвикани од мали камења на нерамните патишта.
Avtovaz досега не објави ништо околу спецификациите на овој автомобил, но се очекува тој да го има истиот мотор како на базичниот модел на Vesta, односно 1,6-литарски Euro 6 бензинец со 16 вентили и 106 коњски сили.
