Во ново интервју, членовите на словенечката група „Laibach“ зборуваа меѓу другото и за откажаниот концерт во Киев, кој требаше да се одржи на 31 март годинава во салата „Бел Етаж“ под името „Евровизија“.
„Настапот не се одржа поради недоразбирање. На годишнината од воената агресија врз Украина сакавме да покажеме поддршка и солидарност со украинската држава и народ, па проверивме дали е можно да се одржи концерт во Киев. Контактиравме со професионален организатор на концерти, кој потврди дека таков концерт во Киев е можен и многу добредојден. За деталите преговаравме околу три месеци. И покрај тоа што организаторите ја одредија цената на билетите за концертот на речиси 20 евра, ние одлучи да не бараме хонорар, туку целиот приход од билетите да ги донираме во добротворни цели и на жртвите од војната во Украина“, велат тие за Večernji list.
Концертот беше официјално најавен на 22 февруари, а билетите беа пуштени во продажба. Тие раскажаа како веднаш по официјалното објавување на концертот на социјалните мрежи имало жестоки реакции и протести поради некои нивни наводни позиции, па промоторот побарал нивна официјална и недвосмислена изјава дека бескомпромисно ја поддржуваат Украина и ја осудуваат Русија како агресор.
„Ние дадовме таква изјава, но додадовме и дека тоа не значи дека мразиме сѐ што е руско и дека сѐ уште безрезервно цениме некои руски уметници. Сепак, организаторот на 26 февруари одлучи да го откаже концертот поради сѐ уште големиот број на негативни коментари за нашите позиции. Тој нѐ информираше дека главната причина за откажувањето на концертот е нашето инсистирање на тврдењето дека Русија е главниот агресор во оваа војна, а не единствениот агресор и дека целата приказна е всушност класична прокси војна, која Украинците воопшто не сакаат да ја слушнат“, изјавија тие.
Исто така тврдат дека списокот на руски уметници кои „Laibach“ ги навеле како нивна инспирација наишол на неразбирање.
„Како што буквално рече промоторот: 'За нас сега сè што е руско е отровно. Руската литература е зло, рускиот јазик е зло, сè што е руско предизвикува само омраза. Гледам дека не го знаевте ова, но вашите изјави предизвикаа доста огорченост'. Секако ни е жал што дојде до оваа забрана и очигледно го потценивме проблемот со идентитетот на Украина, но сепак остануваме на нашите позиции. Сепак, се надеваме дека ќе настапиме во Украина штом ситуацијата ќе биде зрела за тоа“, наведоа од „Laibach“.
