Зад името OCTA се крие Defender кој од место до стотка достигнува за 4 секунди и развива електронски ограничени 250 км/ч.
Defender OCTA може да се гледа како одговор на Land Rover за најмоќната Г-класа на Mercedes, а големата британска „кутија“ наместо претходната 5-литарска V8 опција (525 КС) сега е придвижувана од 4,4-литарскиот V8 мотор на BMW поддржан од благ хибриден систем, така што возачот може да смета на 635 коњи и 800 Nm максимален вртежен момент, кој се дистрибуира на двете оски преку 8-брзински автоматски менувач.
Во Land Rover многу се потрудија околу шасијата, системот за управување и адаптивната суспензија, која е прилагодена на споменатиот потенцијал на моторот, па досега најмоќниот Defender може да се пофали со минимално надолжно и попречно навалување на каросеријата во динамичен ритам на асфалтните површини, во што помогнаа и пошироката патека 22-инчни тркала под продолжените браници, зад кои се кријат сопирачките „потпишани“ од Brembo.
Далеку од асфалтот, на специјално развиени опционални гуми од 20 инчи за сите терени (Goodyear Advance All-Terrain), најмоќниот Defender лесно го оправдува тоа што со децении се смета за еден од најдобрите теренски автомобили на сите времиња. Одлично се снаоѓа на различни површини и безболно поминува низ вода длабока до 100 сантиметри, а дополнителното растојание помеѓу подот и тлото, заедно со редизајнираните елементи на предниот и задниот крај на каросеријата, обезбедува уште поповолен агол на пристап/поаѓање.
Во богато опремената, пространа и обложена со кожа кабина, која се нуди во неколку бои, се издвојуваат посебни и дополнително профилирани предни седишта со интегрирани потпирачи за глава, а верзијата OCTA со која во понудата одат две нови бои на каросеријата, однадвор се препознава по црниот покрив и црната петта врата.
Land Rover за прв пат пред јавноста ќе го претстави најмоќниот Defender на Фестивалот на брзината во Гудвуд, кој започнува на 11 јули, а за првото издание (Edition One) треба да се издвојат нешто повеќе од 156.000 евра.