И покрај константниот напредок во автомобилската индустрија, ретко кој автомобил успеа да го достигне култниот статус на Ferrari F40. Неговата нова верзија ветува многу и се очекува да биде посебен автомобил кој ќе биде нова гордост на италијанскиот производител.
Новата верзија на F40 е модерен суперавтомобил со сите карактеристики кои треба да ги има еден модел на Ferrari.
Кога автомобилот за првпат ѝ беше претставен на публиката во 1987 година по повод 40-от роденден на компанијата, Енцо Ферари сосем самоуверено го претстави како најмоќниот, најбрзиот и најскапиот модел во историјата на Ferrari, но веројатно ни самиот тој не можеше да претпостави дека автомобилот ќе стекне толку посебен статус.
Постер со Ferrari F40 можеше да се најде во скоро сечија машка детска соба, но само мал број луѓе ја имаа честа и привилегијата да седнат во вистинскиот автомобил, а уште помал е бројот на луѓе кои можеа да си го дозволат.
Првиот автомобил во сериско производство со каросериски делови изработени од композитен материјал беше, погодувате, Ferrari F40. Сите 11 делови ги креираше Pininfarina, а конечната бројка на произведени автомобили до 1992 година изнесуваше 1.300 примероци – тројно повеќе од планираното.
Ова беше само дел од историјата на моделот F40 и веројатно ви стана јасно зошто се очекува новиот наследник да биде посебен. На приложените рендери можете да го видите дизајнот на Самир Садиков, кој понуди негово идејно решение за нова верзија за овој автомобил.