Полската фудбалска ѕвезда Роберт Левандовски изјави дека неговата приказна со Баерн Минхен е завршена и дека трансферот е најдоброто решение, пренесува полската новинска агенција PAP.
За 33-годишниот напаѓач веќе подолго време се зборува дека наскоро треба да ја засили Барселона, но, според Bild, каталонскиот гигант не успеал со првата понуда за Полјакот, нудејќи му 32 милиони евра.
Капитенот на полската репрезентација денеска ги потврди гласините за негово заминување, но сè уште не зборувал за евентуален нов клуб.
„Заминувањето во друг клуб е најдоброто решение за двете страни“, изјави 33-годишниот фудбалер кој има договор со баварскиот гигант до крајот на следната сезона.
„Едно е јасно, мојата приказна со Баерн е завршена. После сè што се случуваше во последните месеци, не гледам понатамошна соработка. Верувам дека трансферот е најдоброто решение“, додаде извонредниот Полјак кој во редовите на баварскиот клуб дојде пред осум години од Борусија Дортмунд.
За тоа време, за Баерн постигна 344 гола на 374 натпревари, а минатата сезона го надмина рекордот на славниот Герд Милер (40) по бројот на голови во сезоната во Бундеслигата со 41 гол. За репрезентацијата постигна 75 гола на 129 натпревари.
Баерн во неколку наврати изрази уверување во медиумските настапи по крајот на сезоната дека 33-годишниот фудбалер ќе го испочитува договорот и ќе остане во Баварија уште една година.
