Полскиот репрезентативец Роберт Левандовски во август ќе наполни 35 години, но и покрај овој факт, напаѓачот на Барселона не размислува да стави крај на својата успешна кариера.
Во интервју за Canal+, голгетерот на шпанскиот шампион истакна дека се чувствува фантастично во Барселона, дека му се допаѓа животот во Шпанија и дека воопшто не сака да зборува за повлекување од фудбалот.
„Среќен сум што сум дел од Барселона. Ја ценам и почитувам секоја минута и секој ден што го добивам во толку голем клуб. Првиот пат кога стапнав на стадионот 'Ноу Камп' можев да се уверам дека Барса може да биде многу повеќе од фудбалски клуб. Тоа го чувствувам секој момент кога ќе го облечам нејзиниот дрес и затоа ми е чест што имам можност да играм пред толку посветени навивачи“, рече Левандовски, додавајќи:
„Свесен сум дека крајот на мојата кариера е близу, но во моментов се чувствувам одлично. Не сакам да размислувам за тоа, иако ми е јасно дека поради мојата возраст тоа треба наскоро да се случи. Сепак, јас сè уште сакам да играм, физички сум подготвен, но и знам дека има многу фактори што ќе влијаат на должината на мојата кариера“.
По сите тие убави зборови за Барселона, новинарите се интересираа дали искусниот Полјак кариерата ќе ја заврши во Шпанија, на што тој одговори:
„Не, тоа не го знам. Шпанија е прекрасна, луѓето се насмевнуваат многу повеќе овде отколку во Германија, а во моментов изгледа како да ќе го одиграм последниот професионален натпревар во Барселона. На крајот на краиштата, имам валиден договор и како додека е така, не размислувам за други можности“, рече Полјакот.
