Она што Јирген Клоп го нарече „најдобриот натпревар на Ливерпул во Лигата на шампионите во последните две сезони“ заврши со победа од 3:0 за Барселона и голема предност во пресрет на возвратниот дуел.
Луис Суарез го отвори резултатот, а Лионел Меси двапати ја затресе мрежата на Ливерпул за конечни 3:0 за тимот на Барселона.
По првото полувреме, составот на Ливерпул изгледаше како да ја има контролата над ситуацијата. Иако голот на Суарез донесе предност за Барселона, сепак избраниците на Клоп изгледаа како да ја имаат ситуацијата под контрола, посебно поради фактот што Лионел Меси ретко доаѓаше до шанса да ги покаже неговите квалитети.
Но, второто полувреме испиша многу различна приказна. Најпрво една солидна акција на Барселона заврши со мешаница во шеснаесетникот, по која Луис Суарез ја погоди пречката, а Меси ја следеше ситуацијата и ја испрати во голот. А специјалниот момент беше зачуван за 82-та минута, кога Меси го постави конечниот резултат со еден фантастичен гол од слободен удар.
Тоа беше неговиот 600-ти гол за Барселона, кој го постигна точно 14 години откако за првпат погоди во дресот на каталонскиот клуб.
Пред Ливерпул е исклучително тешка задача. Доколку англискиот тим сака да го повтори минатогодишниот успех и да игра во финалето, на домашен терен мора да надополни дефицит од три гола. А тоа, против ваква Барселона, изгледа скоро недостижно.
