На состанокот на Советот за национална безбедност, претседателот на Белорусија, Александар Лукашенко нареди формирање на доброволна територијална одбрана.
„Ситуацијата не е лесна во моментов и времињата се такви што не би било на одмет секој човек да знае да ракува со оружје“, рече Лукашенко на состанокот на Советот за безбедност, објаснувајќи ја наредбата за формирање на доброволна организација за територијална одбрана.
Во врска со тековната војна во околината на Белорусија, Лукашенко го повтори она што го кажа претходно.
„Белоруската армија ќе се бори само ако нашата земја биде нападната. Во случај на акт на агресија против нас, одговорот ќе биде брз, соодветен и остар. Во меѓувреме, сакам и барам секој човек да знае барем да го заштити својот дом и семејството, а во крајна линија и нашата земја“, рече Лукашенко.
Министерот за одбрана Виктор Хренин додаде дека гореспоменатата територијална доброволна одбрана треба да брои меѓу 100.000 и 150.000 доброволци, а доколку е потребно и повеќе. Во Белорусија моментално има околу 50.000 професионални војници.
