Старт со победа над Ерменија во новата сезона на Лигата на нации во натпревар кој го одбележаа пеналите откако сите три гола беа постигнати од белата точка.
Македонските фудбалери добија посакуван почеток откако во 3. минута по еден корнер Вараздат Харојан направи фаул врз Елиф Елмас и босанскиот судија покажа на белата точка. Во отсуство на Пандев, одговорноста ја презема Езџан Алиоски чиј удар успешно заврши во мрежата на дебитантот Давид Јурченко.
Македонија ја контролираше играта во првиот дел, имаше повеќе посед и со комбинирање на средината се обидуваше да се закани кон голот на Ерменците.
Во 35. минута шанса за втор гол имаше Алиоски кој од слободен удар упати сулен удар кој сепак голманот Јурченко го одбрани.
Само минута подоцна нов пенал за Македонија и тоа повторно по фаул над Елмас при воздушен дуел, овој пат од страна на поранешниот вардарец Ховханнес Хамбарѕумјан. Се смени и изведувачот, сега топката ја зема Илија Несторовски кој го надмудри Јурченко за водство од 2:0.
По паузата Ерменците ја преземаа иницијативата со оглед на негативата од два гола, но тешко доаѓаа до голот на Шишковски.
Најсериозната шанса за гол Ерменија ја имаше во 74. минута кога Артак Григорјан од пред македонскиот гол успеа само да го затресе надворешниот дел од мрежата.
Во финишот Македонија преку Трајковски и Адеми пропушти шанса за трет гол, а во надополнувањето Сероб Григорјан промаши колосална шанса од пред гол.
Сепак Ерменција постигнаа почесен гол и тоа во четвртата минута од надополнувањето. Дарко Велковски го сопна нововлезениот Норберто Бријаско и гостите добија пенал кој го реализираше поранешниот вардарец Тигран Барсегјан.
Старт со победа и 3 бода за Македонија во Групата 2 од Лигата Ц каде од 18 часот во вториот натпревар се среќаваат Естонија и Грузија.
За Македонија настапија: Дамјан Шишковски, Кире Ристевски (71' Стефан Спировски), Висар Муслиу, Дарко Велковски, Стефан Ристовски (к); Аријан Адеми, Бобан Николов (75' Александар Трајковски); Елиф Елмас, Енис Барди, Езџан Алиоски, Илија Несторовски (62' Горан Пандев). Селектор: Игор Ангеловски.
Ова беше 9-ти меѓусебен натпревар по кој сега Македонија води со 4 победи наспроти оние 3 на Ерменија и 2 нерешени.
