Британски Guardian направи репортажа за неповторливата поп музика во 80-тите што се создаваше на територијата на поранешна Југославија и секако – македонските музичари не беа заобиколени.
Репортажата отвора со фактот дека во „бруталистичкиот Нов Белград... во подрумот на спортска сала, се роди првата дискотека во социјалистичка Југославија.“ Се истакнува дека „пред да се појават економските и етничките линии на поделба“ земјата некое време била „успешен социјалистички експеримент, со отворено општество и живописен културен живот“.
Во текстот, секако, се спомнува и дека во Скопје, Македонија, Кирил Џајковски го формирал „Бастион“ со пејачката Ана Костовска, текстописецот Милчо Манчевски и Љубомир Стојсављевиќ на бас. Guardian пишува дека иако групата постоела релативно кратко време, извршила силно влијание.
Се цитира Флора Питроло, која повторно го издаде LP на Бастион од 1984 година преку нејзиниот ACC Records во 2018 година, како го коментира изданието како „ритмички брз скапоцен камен на еклектичниот, експертски синт бран – жанрвски љубопитен, но втемелен во еден светол, гламурозен поп сензибилитет“.
Понатаму се образложува како Џајковски, кој тогаш уште бил во средно училиште, ја собирал опремата за свирење и снимање.
„Тоа беа класични парчиња опрема - имав 808 и Jupiter-4 Roland... сѐ се свиреше во живо на снимка кога снимавме.“
„Луѓето се збунети - Југославија никогаш не беше дел од Источниот блок“, објаснува Џајковски.
„Креативно, тоа беше навистина убав период. Во моите спомени, тоа не е извалкано со политика или нешто слично“.