Садио Мане дојде во Баерн минатото лето од Ливерпул како големо засилување, но потегот не тргна според зацртаното и покрај тоа што клубот ја освои титулата во Бундеслигата.
Откако одиграа разочарувачка сезона, не може а да не се каже дека Ливерпул страдаше од заминувањето на напаѓачот Садио Мане, кој одлучи да оди во Баерн и да биде замена за Роберт Левандовски.
Иако Мохамед Салах продолжи со одличната форма во црвениот дрес, повредите на Луис Диас и Диогу Жота направија ова дуо да не остави трага сезонава, додека на Дарвин Нуњес и Коди Гакпо им требаше време за да се адаптираат на стилот на игра во Премиер лигата.
Додека Роберту Фирмину си заминува од „Енфилд“ поради истекувањето на договорот, Јирген Клоп би можел да профитира од ситуацијата со Садио Мане во Баерн, и по само една сезона да си го врати сенегалскиот бисер. Мане во Ливерпул острави силен печат по доаѓањето од Саутемптен бидејќи секоја сезона постигнуваше двоцифрен број на голови. Како за споредба, во послабата Бундеслига постигна едвај 7.
Но, како за играч што во Ливерпул ги освои сите трофеи, авантурата во Баерн дефинитивно не се одвиваше како што двете страни се надеваа. Всушност, во неодамнешната анкета направена меѓу навивачите од Бундеслигата се вели дека неверојатни 41,7% од испитаниците го посочиле Мане како најголемо разочарување на сезоната, иако му помогна на тимот да ја освои 11-тата последователна титула, во една драматична завршница преземајќи го врвот од дортмундска Борусија.
Отпуштањето на Јулиан Нагелсман беше нов удар за Мане, бидејќи откако на клупата седна Томас Тухел во нападот предност добиваа други опции.
Потоа и ги освои насловните страници откако Баерн беше елиминиран од Лигата на шампионите од Манчестер Сити во четвртфиналето. Вестите од Германија велеа дека Мане наводно го удрил соиграчот Лирој Сане во соблекувалната.
Сѐ уште е рано да се каже дека Мане по само една година ќе си замине од Минхен, но доколку тоа се оствари несомнено е дека ќе има интерес за 31-годишниот Сенегалец.