Генералниот директор на Интер, Џузепе Марота проговори за трансферот на Един Џеко, кој пристигна во миланскиот клуб како замена за Ромелу Лукаку и се покажа како полн погодок.
Џеко во март наполни 35 години, а минатата сезона за Рома постигна само 7 гола во Серија А, па многу навивачи на Интер се сомневаа дека тој е адекватна замена за одличниот Белгиец.
Затоа, пак, сега изгледа како уште еден маестрален трансфер потег на Марота, човек познат по тоа што изгради моќен тим на Јувентус преку слободни трансфери и сега работи слично во Интер.
„Лукаку беше продаден за 115 милиони евра, Џеко го купивме за џабе, а на теренот нема голема разлика“, изјави Марота за Corriere della Sera.
Да потсетиме, Џеко летово потпиша двегодишен договор со Интер, а Рома му овозможи да си замине за мала сума која во овој случај ќе се реализира преку бонуси доколку Интер избори пласман во Лигата на шампионите. Надоместокот на бонус-сметката ќе изнесува 1,8 милиони евра.
Капитенот на репрезентацијата на Босна и Херцеговина оваа сезона во дресот на Интер одигра 21 натпревар во сите натпреварувања, а постигна 11 гола со уште 3 асистенции.