Германската канцеларка Ангела Меркел на денешната видеоконференција на ЦДУ изјави дека бројот на новозаразени може да достигне до 19.200 случаи дневно, ако продолжи сегашниот тренд.
На прашањето како канцеларката ја добила таа бројка, нејзиниот гласноговорник Стефен Сиберт изјави дека по состанокот не може да се коментира изјава дадена во внатрешни кругови.
Меркел истакна дека мора да се запре процесот на зараза и да се интервенира.
„Мораме да поставиме приоритети, да ја одржиме економијата отворена, како и училиштата и градинките. Фудбалот овде е споредна работа“, изјави Меркел.
Од Институтот Роберт Кох во саботата соопштија дека има 2.507 новозаразени, а денеска таа бројка е 1.192 нови случаи.
Канцеларката за проблематични ги смета забавите, посетите на ресторани и верските настани.
„Бројот на заразени во Европа е загрижувачки. Мора сè да се преземе во Германија за да не продолжат бројките да растат“, истакна Меркел.
Во Германија од почетокот на епидемијата се регистрирани 286.000 заразени.
