Месечевиот лендер на Intuitive Machines е на пат кон Месечината по успешното лансирање во четвртокот, а во меѓувреме испрати неколку неверојатни фотографии на Земјата, направени додека сè уште беше блиску до нашата планета.
Intuitive Machines преку своите профили на социјалните мрежи објави фотографии направени за време на мисијата IM-1, а исто така е потврдено дека леталото е во одлична состојба.
Фотографиите ја прикажуваат Земјата, но и дел од самиот лендер Nova-C, познат и како Odysseus (Одисеј), како и втората етапа од ракетата Falcon 9 на SpaceX, која останала во далечината по одвојувањето.
Odysseus е на пат кон Месечината, а обидот за слетување е планиран за 22 февруари. Засега се чини дека сè оди според планот, а тимот кој стои зад мисијата периодично објавува нови информации. Досега беше објавено дека лендерот поминал некои важни пресвртници на својот пат до површината на Месечината, вклучувајќи го и активирањето на моторот.
Тоа всушност беше „првото палење на мотор со течен метан и течен кислород во вселената“, според Intuitive Machines.
