Аргентинскиот фудбалер Лионел Меси (35) има два услова за ПСЖ ако францускиот клуб сака еден од најдобрите играчи на сите времиња да потпише нов договор, пренесуваат француските медиуми.
Актуелниот договор на Меси со клубот од Париз истекува на 30 јуни, а челниците на ПСЖ веќе почнаа да го спроведуваат продолжувањето на договорот со Аргентинецот.
„Нема да биде лесна задача. Меси ѝ дава предност на понудата на ПСЖ, но поставува два јасни услови за продолжување на договорот. Меси бара плата од 40 милиони евра по сезона и сака гаранција дека секогаш ќе биде во стартниот состав на ПСЖ, без разлика кој да биде тренер на клубот. Аргентинецот сака да остане во форма бидејќи планира следната година да игра на Копа Америка“, пишуваат Французите.
Меси има право да преговара и со други клубови, но аргентинскиот новинар Цезар Луис Мерло наведува дека неговиот сонародник сака да остане во ПСЖ.
„Позицијата на Меси не е променета до денес, неговите намери се да остане во ПСЖ. Закажани се состаноци за продолжување на договорот кој истекува на 30 јуни, за да се разработат некои детали“, изјави тој.
Мерло додаде дека засега не размислуваат за други дестинации.
