Лидерот нa ВМРО-ДПМНЕ се обрати во јавноста првпат откако е хоспитализиран поради COVID-19.
Мицкоски веќе скоро две недели се наоѓа на лекување во Инфективната клиника во Скопје откако се зарази со коронавирусот. На својот профил на Facebook ги сподели впечатоците од болеста.
„Тринаесетти ден откако сум ковид-позитивен. Поминав исклучително тешки 12 дена, велат излегувам од т.н. цитокинска бура, интерлеукин 6 се намалувал. Денес ми е прво утро без покачена температура, подобро се чувствувам“, го почнува својот статус.
„Ова што јас го преживувам не сакам да биде ничија реалност бидејќи вирусов е страшен. Сакам да упатам јавна благодарност до целиот медицински персонал на Инфективна клиника во Скопје. Секој од нив е вистински борец и нивната посветеност и пожртвуваност не се опишува со зборови“, додава.
Потоа, како лидер на опозицијата, ја критикувапше и власта за ситуацијата со коронавирусот во државава и тоа што вакцинацијата сѐ уште не е почната, освен за медицинските лица.
„Жално и трагично е што сѐ уште не е започнат процесот на вакцинација бидејќи без тоа нема решение, а очигледно за него ќе чекаме уште многу. Ќе помине и мојата здравствена мака, ама ќе започне маката на Владата заради оваа неодговорност и неспособност за набавка на вакцини. Не е време за циркус со шпиунски игри, треба сериозни луѓе на вистински места што знаат како. Ако на времето беше смешно кога ќе слушневме дека блескаме, денес е трагично бидејќи блескаме поради срамот, простотилукот, неспособноста на власта. Доаѓа денот за одговорност“, заврши тој.
13 ден откако сум ковид позитивен. Поминав исклучително тешки 12 дена, велат излегувам од т.н., цитокинска бура,...
Posted by Hristijan Mickoski on Tuesday, March 9, 2021